4:15 AM
Email:knewdaynews@yahoo.com
កណ្តាល: ជាមួយនឹងទេសភាពតាមដងអូរដ៏ស្រស់ត្រកាល និងសម្បូរចំណីអាហារទទួលទាន រមណីយដ្ឋានកៀនស្វាយ បានទាក់ទាញភ្ញៀវទេសចរ ឲ្យមកកម្សាន្តយ៉ាងច្រើន ពិសេសពីរាជធានីភ្នំពេញ ប៉ុន្តែពេលដែលគេដាក់បង្គុយលើតូប ដែលសង់តាមមាត់ទឹក សម្រាប់ភ្ញៀវអង្គុយលេង ស្រាប់តែក្រឡេកឃើញសំរាមអណ្តែតត្រៀបត្រា នៅលើផ្ទៃទឹក ដែលនៅក្បែរតូបនោះ។ភ្ញៀវទេសចរម្នាក់ ដែលបានមកកម្សាន្តរមណីយដ្ឋាននេះ បានប្រាប់អ្នកយកព័ត៌មានយើងថា "តម្លៃតូបនៅទីនេះ មិនជាថ្លៃប៉ុន្មានទេ(ពី៧.០០០ទៅ១០.០០០រៀល) ប៉ុន្តែ អ្វីដែលយើងខកចិត្តនោះ គឹសំរាម ដែលអណ្តែតនៅលើផ្ទៃទឹក ក្រោមតូបខ្ពស់ៗនោះ វាធ្វើឲ្យយើងស្ទើរតែអស់អារម្មណ៍រលីង"។
ទាក់ទិននឹងការរិះគន់នេះ អ្នកស្រុកកៀនស្វាយម្នាក់ ដែលសុំមិនបញ្ចេញឈ្មោះ បានលួចខ្សឹបប្រាប់អ្នកយកព័ត៌មានយើងថា តាមពិត តូបទាបៗ ព្យាយាមសម្អាតណាស់ ព្រោះខ្លាចភ្ញៀវមិនចូលអង្គុយ ប៉ុន្តែមានតែតូបខ្ពស់ៗ១-២ ប៉ុណ្ណោះ ដែលពង្រាយសំរាម។ ពួកគាត់មិនបានយកសំរាមទៅចោលទាំងអស់ទេ គឺរលាស់សំរាមចោលទៅក្នុងទឹកតែម្តង ដោយមិនខ្វល់ថា សំរាមអណ្តែតលើផ្ទៃទឹក នាំឲ្យខូចបរិស្ថាននោះទេ។
ប្រភពនោះ បានឲ្យដឹងទៀតថា ពេលដែលមន្ត្រីក្រសួងបរិស្ថាន ឬភ្នាក់ងារមានសមត្ថកិច្ចមកដល់ ទើបម្ចាស់តូបទាំងនោះនាំគ្នាសម្អាត។ភ្ញៀវទេសចរជាច្រើន បានសំណូមពរទៅសមត្ថកិច្ច ពិសេស មន្ត្រីក្រសួងបរិស្ថាន សូមមេត្តាណែនាំម្ចាស់តូបទាំងនោះ ឲ្យធ្វើអនាម័យ និងសម្អាតសំរាមទាំងនោះផង ពិសេសសូមកុំលក់ម្ហូបអាហារថ្លៃពេក បើមិនដូច្នោះទេ ភ្ញៀវទេសចរ ប្រហែលជាប្តូរចិត្តទៅកម្សាន្តកន្លែងផ្សេងទៀតហើយ៕
0 comments:
Post a Comment